Վարկերի բեռը ծանրանում է․ Հայաստանի քաղաքացիները գնալով ավելի են մխրճվում պարտքերի մեջ

Հայաստանում սպառողական վարկերի ծավալները շարունակում են արագ աճել՝ արտացոլելով բնակչության ֆինանսական վիճակի վատթարացումը և կյանքի թանկացման հետևանքները։ Պաշտոնական տվյալների համաձայն՝ երկրի բանկային համակարգի ընդհանուր վարկային պորտֆելը գերազանցում է 8 տրիլիոն դրամը, որից շուրջ 1,8 տրիլիոն դրամը բաժին է ընկնում ֆիզիկական անձանց տրամադրված սպառողական վարկերին։

Ակտիվ սպառողական վարկերի քանակն արդեն անցել է 1,5 միլիոնի սահմանը։ Միայն վերջին մեկ տարվա ընթացքում սպառողական վարկավորումն աճել է 27,5 տոկոսով, իսկ հիփոթեքային վարկավորումը՝ ևս 13 տոկոսով։ Արդյունքում, ֆիզիկական անձանց կողմից վերցված վարկերի ընդհանուր ծավալը մեկ տարվա ընթացքում աճել է ավելի քան 40 տոկոսով։

Փորձագետների գնահատմամբ՝ այս միտումը պայմանավորված է ոչ միայն բանկերի ակտիվ վարկային քաղաքականությամբ, այլև բնակչության եկամուտների և ծախսերի միջև խորացող անհավասարակշռությամբ։ Մինչ քաղաքացիները փորձում են պահպանել իրենց կենսամակարդակը, նրանք ավելի հաճախ են դիմում վարկային միջոցների օգնությանը։

Միևնույն ժամանակ, երկրում շարունակվում է գնաճային ճնշումը։ Տարվա սկզբից սպառողական գներն աճել են 5,3 տոկոսով, իսկ պարենային ապրանքների գները՝ 9,5 տոկոսով։ Սա նշանակում է, որ ընտանիքների ծախսերը մեծանում են ավելի արագ, քան նրանց ֆինանսական հնարավորությունները, ինչն էլ նոր վարկեր վերցնելու հիմնական պատճառներից մեկն է դառնում։

Տնտեսագետները զգուշացնում են, որ եթե եկամուտների աճը չհամապատասխանի վարկային բեռի աճին, ապա առաջիկա տարիներին Հայաստանը կարող է բախվել բնակչության պարտքային ծանրաբեռնվածության լուրջ խնդիրների։