Արթուր Օսիպյանը և իր նմանները որտե՞ղ են կռվել, փախածներ են․ Նիկոլ Փաշինյան

Ինձ համար Սամվել Շահրամանյանն ու Արթուր Օսիպյանը նույն կատեգորիայի մարդիկ են։ Արթուր Օսիպյանը կռվե՞լ է, որ մի հատ էլ եկել ու Ղարաբաղի հարց է առաջ տանում։ Որտե՞ղ է կռվել, որտե՞ղ է եղել ինքը ընդհանրապես պատերազմի ժամանակ։ «Իշխանություն» լրատվականի փոխանցմամբ՝ այս մասին այսօր հայտարարեց Նիկոլ Փաշինյանը պատասխանելով երեք հոդվածով մեղադրվող և կալանքի տակ գտնվող Արթուր Օսիպյանի վերաբերյալ լրագրողի հարցին։

«Նա և իր նման փսևդոէլիտայի ներկայացուցիչները պիտի ներողություն խնդրեն։ Ձեզ թվում է՝ մենք այդքան միամի՞տ ենք ու չգիտենք իր և Ղարաբաղի իշխանության կապերի մասին»,- ասաց նա։

Փաշինյանը շեշտեց, որ Օսիպյանն ու նրա համախոհները պետք է ներողություն խնդրեն նահատակների ընտանիքներից, քանի որ փորձում են շարունակել այդ պրոցեսը և Հայաստանը վերադարձնել կոնֆլիկտի մեջ։

«Այո՛, ինքը և իր նմանները, էլի եմ ասում, խոսքս վերաբերում է Ղարաբաղի փսևդոէլիտային։ Նրանք փախածներն են, որոնք պատանդ են պահել Ղարաբաղի ժողովրդին Ղարաբաղում, հիմա էլ Հայաստանում են պատանդ պահում։ Իրենք էլ չեն դիմում Հայաստանի քաղաքացիություն ստանալու համար և ուրիշներին էլ հորդորում են, որ չդիմեն»,- եզրափակեց Փաշինյանը։