Կինը՝ որպես պետության հենասյուն. մեր ծրագրային քայլերը, որոնք կուղղվեն ձեր բարեկեցությանը․ Զուրաբյան

ՀԱԿ վարչապետի թեկնածու, ՀԱԿ փոխնախագահ Լևոն Զուրաբյանը գրում է․

«Սիրելի կանայք,

Գեղեցկության և հմայքի կրողներ, մեր հոգևոր հանգստի պահապաններ և զգացմունքային փոթորիկների հրահրիչներ, մայրեր, քույրեր, սիրելիներ,

Շնորհավորում եմ ձեզ կանանց տոնի կապակցությամբ և մաղթում, որ սերն ու երջանկությունն անպակաս լինի ձեզնից, որ քնքուշ հոգատարության մեջ անհոգ լինեք, իսկ վերը նշված զգացմունքային փոթորիկները նավարկեք վստահությամբ և երանությամբ:

Այս անգամ մարտի 8-ի տոնը շնորհավորելով որպես վարչապետի թեկնածու, ցանկանում եմ նաև ներկայացնել մեր այն ծրագրերը, որոնք կապված մեր երկրում կանանց կյանքը բարելավելու հետ և կիրականացվեն պետության կողմից մեր քաղաքական ուժի հաղթանակի դեպքում.

– Մինչև 3 տարեկան երեխա ունեցող կանանց համար հարկային արտոնություններ։

– Մանկապարտեզի կամ դայակի վաուչերներ փոքր երեխաներ ունեցող ընտանիքների համար պետության կողմից: Սա թույլ կտա, որ հատկապես երիտասարդ մայրերը ավելի հեշտ վերադառնան աշխատանքի։

– Անվճար վերապատրաստման ծրագրեր այն կանանց համար, որոնք ունեն 5 տարեկանից փոքր երեխա:

– Աշխատանքի տեղավորման հատուկ ծրագրեր միայնակ մայրերի համար։

– Հետծննդաբերական առողջության ծրագիր՝ ծննդից հետո առաջին տարվա ընթացքում կանանց համար անվճար բժշկական և հոգեբանական խորհրդատվություն։

– Ընտանեկան բռնության դեմ իրական պայքար և կանխարգելիչ աշխատանք:

– Անվճար նախադպրոցական հաստատությունների հասանելիության ապահովում, հատկապես մարզերում:

Սիրով ու խոնարհումով` ի գո´րծ»: