Ինչպե՞ս է լինում, որ Գեղամ Նազարյանն անցնում է խորհրդարան, դառնում՝ Նազար Գեղամյան. հարց՝ Քոչարյանին

«Իշխանություն» լրատվականի փոխանցմամբ՝ Ախուրյանում Ռոբերտ Քոչարյանի հետ հարց ու պատասխանի ժամանակ քաղաքացիներից մեկը մտահոգություն հայտնեց, որ որոշ ընդդիմադիր գործիչներ ու Սյունիքի համայնքապետեր ճնշումների հետևանքով անցել են Նիկոլ Փաշինյանի կողմը։

Ի պատասխան քաղաքացու մտահոգությանը՝ Ռոբերտ Քոչարյանը ներկայացրեց ցուցակը կազմելու սխալներն ու բացթողումները՝ նշելով, որ իշխող ուժի գործադրած ճնշումներին ու քրեական գործերին ոչ բոլորն են դիմացել, սակայն 29 հոգանոց ֆրակցիայից եղել է ընդամենը մեկ կորուստ՝ Գեղամ Նազարյանը։

Երկրորդ նախագահն անդրադարձավ նաև մարզերի խնդիրներին՝ քննադատելով Ռուսաստանի հետ հարաբերությունների վատթարացումը, որը հարվածում է խոպանչիներին։ Ըստ նրա՝ իշխանությունն ամեն ինչ կենտրոնացնում է Երևանում, իսկ գյուղերում միայն մայթ սարքելով ժողովրդին խաբում են, մինչդեռ գյուղատնտեսությունը անկում է ապրում։

«Ես երբեք իմ կյանքում թույլ չեմ տվել որևէ քայլ, որի համար կամաչեմ պատմել իմ զավակներին ու թոռնիկներին։ Իմ կյանքի բանաձևն է՝ մի՛ արա մի բան, որի համար հետո կամաչես»,- եզրափակեց Ռոբերտ Քոչարյանը։