Բողոքի ակցիաներ կլինեն Երեւանում․ որն է պատճառը

Մայիսի 4-ին Կարեն Դեմիրճյանի արձանի մոտ՝ Մարզահամերգային համալիրի տարածքում, նախատեսվում է հավաք՝ ի պաշտպանություն հայ գերիների, արցախահայերի վերադարձի իրավունքի։

Մայիսի 4-ին Հայաստանում նախատեսվում է բողոքի ակցիա, որի նպատակն է ուշադրություն հրավիրել երկրում առկա մի շարք խնդիրների վրա։ Կազմակերպիչների խոսքով՝ ակցիան ուղղված է ինչպես ներքին իրավիճակի, այնպես էլ տարածաշրջանային զարգացումների վերաբերյալ «իրական պատկերի» ներկայացմանը։

Նրանք նշում են, որ Հայաստանում առկա են մի շարք մտահոգիչ երևույթներ, այդ թվում՝ քաղաքական բանտարկյալների առկայություն, դատական համակարգի նկատմամբ վերահսկողություն, ոստիկանության կողմից բռնությունների դեպքեր, ինչպես նաև խոսքի ազատության սահմանափակումներ։ Բացի այդ, ընդգծվում է եկեղեցու նկատմամբ ճնշումների և հասարակության մեջ ատելության խոսքի տարածման հարցը։

Միաժամանակ կազմակերպիչները անդրադառնում են նաև Արցախում ստեղծված իրավիճակին՝ նշելով, որ շարունակվում է հայկական քրիստոնեական մշակութային ժառանգության ոչնչացումը, իսկ արցախցիների իրավունքները, իրենց գնահատմամբ, մնում են անպաշտպան։

Ակցիան, ըստ նախաձեռնողների, ունի նաև արտաքին հասցեատերեր։ Այն ներկայացվում է որպես ուղերձ միջազգային հանրությանը, եվրոպական առաջնորդներին և այն պաշտոնյաներին, ովքեր նախատեսում են ժամանել Հայաստան Եվրոպական քաղաքական համայնքի գագաթնաժողովի շրջանակում։

Ակցիայի մեկնարկը նախատեսված է ժամը 09։00-ին։ Տեղեկացվում է, որ միջոցառումը տեղի կունենա համալիրի տարածքում, սակայն հստակ տեղակայման վերաբերյալ տեղեկատվությունը կհրապարակվի ավելի ուշ՝ փակվող փողոցների մասին տվյալների հրապարակումից հետո։

Կազմակերպիչները նշում են, որ մասնակցությունը բաց է բոլոր քաղաքացիների, ինչպես նաև քաղաքական ուժերի, հասարակական կազմակերպությունների և տարբեր միավորումների համար։