Բայրաքթարների հարցը կլուծվեր, եթե ՍՈՒ-երի փոխարեն ՀՕՊ գնեինք․ Ռոբերտ Քոչարյան

«Իշխանություն» լրատվականի փոխանցմամբ՝ «Հայաստան» դաշինքի առաջնորդ, ՀՀ երկրորդ նախագահ Ռոբերտ Քոչարյանն այսօր Դիլիջանում հանդիպում ունեցավ քաղաքացիների հետ։

Հանդիպման սկզբում նախագահը հիշեց նախկինում իրականացված ենթակառուցվածքային նախագծերը՝ մասնավորապես Ծաղկաձորի և Ջերմուկի ճոպանուղիների կառուցումը, ընդգծելով, որ տեղական նախաձեռնողականությունը միշտ արժանացել է պետական աջակցության։

Անդրադառնալով անվտանգության հարցերին՝ Ռոբերտ Քոչարյանը ներկայացրեց պետության ամրության բանաձևը։

«Անվտանգության համակարգը հենվում է երեք սյուների վրա՝ մարտունակ բանակ, ուժեղ առաջնորդ և հզոր դաշնակից։ Մարդկությունը ուրիշ մոդել չունի»,- ասաց նա։

Երկրորդ նախագահը խիստ քննադատության ենթարկեց գործող իշխանությունների վարած քաղաքականությունը՝ նշելով, որ 44-օրյա պատերազմի ծանր հետևանքները հենց այդ երեք գործոնների խաթարման արդյունքն էին։ Նա շեշտեց սպառազինության սխալ գնումների մասին՝ օրինակ բերելով առանց հրթիռների գնված ՍՈՒ-30 կործանիչները, որոնք պատերազմի ժամանակ այդպես էլ չկիրառվեցին։

Նախագահն իր մտահոգությունը հայտնեց նաև Ֆրանսիայից զենքի գնման վերաբերյալ՝ մատնանշելով լոգիստիկ լուրջ խնդիրները։

«Հարց է առաջանում՝ քարտեզին նայե՞լ եք։ Ինչպե՞ս եք Ֆրանսիայից այդ արկերը հասցնելու Հայաստան, երբ օդային և ցամաքային ուղիները կարող են փակ լինել։ Սա ավելի շատ նման է ֆրանսիական ռազմաարդյունաբերական համալիրը ֆինանսավորելուն, քան իրական անվտանգության հարց լուծելուն»,- ասաց Քոչարյանը։

Ելույթի ավարտին Ռոբերտ Քոչարյանը պատկերավոր համեմատություն անցկացրեց՝ գործող վարչապետի գործողությունները նմանեցնելով էլեկտրական վարդակի մեջ մեխ մտցնող երեխայի, ում սխալների համար հոսանքահարվում և գին է վճարում ժողովուրդը։

Նախագահը կոչ արեց քաղաքացիներին տեր կանգնել սեփական ճակատագրին և հունիսի 7-ին կատարել գիտակցված ընտրություն՝ հանուն երկրի վերածննդի։ Հանդիպումն անցավ ակտիվ մթնոլորտում, որին հաջորդեց քաղաքացիների հետ ինտերակտիվ հարցուպատասխանը։