Ո՞ւմ կարգելվի շահումով խաղեր խաղալ․ Հայկ Սարգսյանի նոր նախագիծը

«Իշխանություն» լրատվականի փոխանցմամբ՝ ազգային ժողովում երկրորդ ընթերցմամբ քննարկվեց խաղային գործունեության, շահումով ու ինտերնետ շահումով խաղերի և վիճակախաղերի ոլորտը կարգավորող օրենսդրական նախագծերի փաթեթը:

Զեկուցող, ԱԺ պատգամավոր Հայկ Սարգսյանը ներկայացրեց այն արմատական սահմանափակումները, որոնք առաջինից երկրորդ ընթերցում ընկած ժամանակահատվածում բերվել են վերջնական կոնսենսուսի կառավարության և ոլորտի ներկայացուցիչների հետ:

Նախագծով զգալիորեն ընդլայնվում է այն անձանց շրջանակը, ում օրենքով կարգելվի մասնակցել բարձր ռիսկայնության խաղերին: Եթե նախկինում տարիքային սահմանափակումը գործում էր միայն մինչև 21 տարեկանների համար, ապա այժմ վերին շեմ է սահմանվել։

«Արգելք ենք սահմանել նաև 70 տարին լրացած քաղաքացիների համար շահումով խաղերին մասնակցելու, որպեսզի նրանք չկարողանան բարձր ռիսկային խաղերին մասնակցել», — հայտարարեց Հայկ Սարգսյանը:

Բացի այդ, խաղատներից և օնլայն հարթակներից «կվտարվեն» պետական ու համայնքային միջոցներից ֆինանսավորվող անձինք:

Ըստ Հայկ Սարգսյանի՝ խաղալը պետք է արգելել․

• Պետական, համայնքային ծառայության և հանրային պաշտոններ զբաղեցնողներին,

• Հանրային իշխանության մարմիններում քաղաքացիական աշխատանք կատարողներին,

• ՊՈԱԿ-ների և ՀՈԱԿ-ների աշխատակիցներին,

• Պետության հիմնադրած հիմնարկների և 50% ու ավելի պետական մասնակցությամբ ընկերությունների աշխատակիցներին,

• Կենտրոնական բանկի աշխատակիցներին: