Հույս ունենք՝ շատ շուտով կունենանք բաց ցամաքային սահման հարևան Թուրքիայի հետ. Մարիա Կարապետյան

Ստամբուլում ընթացող ԵԱՀԿ ԽՎ աշնանային նստաշրջանի աշխատանքներին մասնակցում է վեհաժողովում Ազգային ժողովի պատվիրակությունը՝ Արտաքին հարաբերությունների մշտական հանձնաժողովի նախագահ, պատվիրակության ղեկավար Սարգիս Խանդանյանի գլխավորությամբ: Նստաշրջանի ընթացքում ելույթ է ունեցել ԱԺ պատվիրակության անդամ Մարիա Կարապետյանը:

«Շնորհակալություն, տիկի՛ն նախագահ, հարգելի՛ գործընկերներ,

Օգոստոսի 8-ին Վաշինգտոնում Հայաստանն ու Ադրբեջանը պատմական քայլ կատարեցին՝ նախաստորագրելով խաղաղության համաձայնագիրը և վերահաստատելով բոլոր հաղորդակցությունները վերաբացելու իրենց հանձնառությունը՝ հիմնված ինքնիշխանության և իրավազորության նկատմամբ լիակատար հարգանքի վրա: Հայաստանը և Միացյալ Նահանգներն էլ պայմանավորվել են աշխատել միմյանց և փոխհամաձայնեցված այլ գործընկերների հետ՝ «Թրամփի ուղի հանուն միջազգային խաղաղության և բարգավաճման» նախագծի վրա:

Սա լայնածավալ ենթակառուցվածքային ծրագիր է նոր երկաթուղիների, գազի և նավթի խողովակաշարերի, էլեկտրաէներգիայի ու ինտերնետի մալուխների անցկացման համար ամբողջ Հայաստանում:

Այս առումով, հարգելի՛ գործընկերներ, Հարավային Կովկասում ենթակառուցվածքային նախագծերի մասին խոսելիս չափազանց կարևոր է օգտագործել լեգիտիմ տերմինաբանությունը, որը փոխադարձ համաձայնեցված է և հարգում է տարածքային ամբողջականության ու ինքնիշխանության սկզբունքները:

Ադրբեջանն այս հոկտեմբերին հայտարարեց, որ վերացնում է իր տարածքով Հայաստան ապրանքների տարանցման նկատմամբ բոլոր սահմանափակումները, և նախագահ Ալիւեը դա համարեց հստակ նշան, որ Ադրբեջանի ու Հայաստանի միջև խաղաղությունը գոյություն ունի ոչ միայն թղթի վրա, այլև գործնականում: Հայաստանն իր երախտագիտությունն է հայտնել այս կապակցությամբ և պատրաստակամություն հայտնել տարանցում ապահովել Թուրքիայից դեպի Ադրբեջան, ինչպես նաև Ադրբեջանի երկու մասերի միջև՝ այսօր մեր տարածքում առկա ճանապարհներով:

Ադրբեջանի և Վրաստանի տարածքով դեպի Հայաստան հացահատիկի փոխադրումը Ղազախստանից ու Ռուսաստանից ցույց է տալիս, որ ավելի լայն տարածաշրջանն ընդունում է խաղաղության փաստը և արդեն օգուտներ է քաղում հաղորդակցությունների ապաշրջափակումից:

Հարավային Կովկասում Հայաստանը, Ադրբեջանը և Վրաստանը կարող են ամրապնդել միմյանց, ինչպես նաև տարածաշրջանի դերը՝ որպես կարևորագույն տարանցիկ հանգույց, որը կապում է Եվրոպան, Սև ծովը, Թուրքիան, Կասպից ծովը և Կենտրոնական Ասիան:

Մենք հույս ունենք, որ շատ շուտով կունենանք նաև բաց ցամաքային սահման ու դիվանագիտական հարաբերություններ մեր հարևան Թուրքիայի հետ:

Ամփոփելով՝ այս նոր տարածաշրջանային միջավայրն իրական հնարավորություններ է բացում Եվրոպական միության Գլոբալ դարպասների ռազմավարության և Միջին միջանցքի համար:

Շնորհակալություն»,- ասել է Մարիա Կարապետյանը: