Եթե պտտեցինք վերադարձի թափանիվը՝ «մեծ կտորն ականջն է մնալու». Նիկոլ Փաշինյան

Ըստ Նիկոլ Փաշինյանի, երբ մարդն ասում է, որ ինքը Վանից է, դա ոչ թե հայրենասիրական մոտեցում է, այլ՝ կայսերական հայրենասիրության դրսևորում։

«Չեմ վարանի ասել՝ դա ստալինյան հայրենասիրության դրսևորում է»,- կառավարության այսօրվա նիստում հայտարարեց Փաշինյանը։

Նա չի ընդունում, երբ ասում են, որ 2020 թվականից առաջ Հայաստանը խաղաղություն է ունեցել։

«Մենք ունեցել ենք սառեցված պատերազմ, մենք ունեցել ենք պատերազմի հետաձգում մեր ինքնիշխանության, մեր անկախության, մեր ազատության ու մեր զարգացման հաշվին»,- նշեց Փաշինյանը։

Նրա խոսքով՝ իրենք հիմա Հայաստանի նավը հասցրել են խաղաղության հանգրվանի, ուղղակի նավի ուղևորներին պետք է խաղաղվել, իսկ խաղաղվել նշանակում է տնավորվել, բոխչաները քանդել ու դասավորել պահարաններում։

«Այսինքն՝ անցնել մշտական բնակության ռեժիմի, հակառակ դեպքում, երբ մեր տարածաշրջանում վերադարձի թափանիվը պտտեցինք՝ տարածաշրջանից «մեծ կտորն ականջն է մնալու» ու դրա մեջ գիտենք, թե ամենաշատն ով է տուժողը լինում»,- հայտարարեց Փաշինյանը։

Նա ասաց, թե այս օրը շատ մեծ պատմական ձեռքբերում է, որի մասին կխոսի մեկ ամիս հետո։

«Դա չի կարելի զոհել գերտերությունների շահերին»,- հավելեց Նիկոլ Փաշինյանը։