Նիկոլ Փաշինյանը մուրճը վերցրած քանդում է մեր երկիրն ու բանակը․ Ռոբերտ Քոչարյան

«Իշխանություն» լրատվականի փոխանցմամբ՝ «Հայաստան» դաշինքի առաջնորդ, երկրորդ նախագահ Ռոբերտ Քոչարյանը լրագրողների հետ զրույցում անդրադարձավ Մարդու իրավունքների եվրոպական դատարանի (ՄԻԵԴ) վճիռների իշխանական մեկնաբանություններին, Ռուսաստանի հետ հարաբերությունների վատթարացման տնտեսական հետևանքներին և Արցախի ժողովրդի իրավունքների պաշտպանությանը:

Մեկնաբանելով Նիկոլ Փաշինյանի հայտարարություններն այն մասին, թե ՄԻԵԴ վճիռների համաձայն՝ Ռոբերտ Քոչարյանը պետք է երկար տարիներ նստի, երկրորդ նախագահը նշեց, որ գործող վարչապետը պարզապես չի կարդացել այդ փաստաթուղթը կամ դիտավորյալ խեղաթյուրում է իրականությունը:

«Ես կարծում եմ՝ այդ ինքնահռչակ տգետը այդ վճիռը չի կարդացել, իրեն հիմարի տեղ է դնում և չի հասկանում, թե ինչի մասին է խոսքը: Այդ վճիռը վերաբերում է նրան, որ Մարտի 1-ի մահվան դեպքերը մինչ օրս բացահայտված չեն: Եվ այդ վճիռն առաջին հերթին վերաբերում է հենց իրեն՝ Նիկոլ Փաշինյանին, քանի որ ութ տարի ինքն է իշխանության ղեկին, և այդ ընթացքում ոչ մի մահվան դեպք չի բացահայտվել: Ուրիշ բովանդակություն այդ վճռի մեջ չկա»,- ասաց Քոչարյանը:

Նախագահի պնդմամբ՝ նման հայտարարություններով Նիկոլ Փաշինյանը հերթական անգամ բացահայտ հրահանգ է տալիս դատական համակարգին, ինչը եվրոպական ցանկացած այլ երկրում կհանգեցներ քաղաքական գործչի հրաժարականին:

Անդրադառնալով Ռուսաստանի Դաշնությունից և ԵԱՏՄ կառույցներից ստացվող ազդակներին, գազի ու հացահատակի արտոնյալ գներին և հնարավոր տնտեսական պատժամիջոցներին՝ Ռոբերտ Քոչարյանն ընդգծեց, որ Ռուսաստանն արդեն իսկ անցել է նախազգուշական գործողությունների, ինչի առաջին օրինակը ծաղիկների արտահանման արգելքն է: