Ընդդիմությունը պետք է դիմի կտրուկ քայլերի․ Էդմոն Մարուքյան

Եթե մարդը տեսախցիկից փախչում է, ուրեմն ընտրությունն ազատ չի։ Եթե մարդուն սոցիալական ցանցում «լայք» դնելու համար ազատում են աշխատանքից, ուրեմն ազատ չի։ «Իշխանություն» լրատվականի փոխանցմամբ՝ այս մասին այսօր հայտարարել է «Լուսավոր Հայաստան» կուսակցության նախագահ Էդմոն Մարուքյանն անդրադառնալով ընտրական խախտումներին և քաղաքական հնարավոր զարգացումներին։

Էդմոն Մարուքյանի գնահատմամբ՝ վերջին ինը տարիների ընթացքում առաջին անգամ հարվածի տակ են դրվել ընտրությունների հիմնարար չափանիշները։ Ըստ նրա՝ ի տարբերություն 2018 և 2021 թվականների ընտրությունների, այս անգամ գրանցվել են լրջագույն խնդիրներ։

Մարուքյանը նշում է, որ նախընտրական շրջանում ակտիվորեն կիրառվել է վարչական ռեսուրսի և Ազգային անվտանգության ծառայության (ԱԱԾ) լծակները։ Նրա խոսքով՝ եղել են դեպքեր, երբ ԱԱԾ-ն հետևել է իրենց քարոզարշավին գյուղերում և զանգահարել համայնքապետերին՝ հաշվետվություն պահանջելով, թե ինչու են թույլ տվել այդ հանդիպումները։

Կուսակցության նախագահը շեշտում է, որ ձայների հաշվարկի գործընթացը մինչ օրս մնում է անհասկանալի և մշուշոտ։ Կորած և ապա մասնակիորեն «վերականգնված» ձայների պատմությունը, ինչպես նաև հանձնաժողովների կայացրած որոշումները զուրկ են եղել թափանցիկությունից, ինչի պատճառով դեռևս հստակ չէ, թե քանի ուժ է անցնում խորհրդարան։

«Ամենաշատ ձայներ հավաքած ընդդիմադիր ուժի՝ «Ուժեղ Հայաստան» դաշինքի առաջնորդ Սամվել Կարապետյանն առաջարկել է երկու տարբերակ՝ կա՛մ նշանակել նոր ընտրություններ, կա՛մ գնալ ընտրությունների երկրորդ փուլ՝ լեգիտիմ իշխանություն ձևավորելու համար։ Կարապետյանի տրամաբանությունն այն է, որ երկրորդ փուլում ընդդիմության ձայները կմիավորվեն Նիկոլ Փաշինյանի դեմ»,- ասում է նա։

Էդմոն Մարուքյանն ընդդիմությանն առաջարկում է մանդատները չվերցնել և խորհրդարան չգնալ։

«Եթե ընդդիմությունը չօգտագործի այս լծակը, Սահմանադրական դատարանն ու ԿԸՀ-ն կհաստատեն ընտրությունների արդյունքները, իսկ ընդդիմադիր ուժերը կգնան խորհրդարան՝ աշխատելու մի համակարգում, որի լեգիտիմությունն իրենք իսկ չեն ճանաչում։ Դրանով նրանք միջազգային հանրությանը ազդակ կհաղորդեն, թե ամեն ինչ նորմալ է, և իրավիճակը կհանդարտվի։ Իսկ եթե դրվի մանդատներից հրաժարվելու կոշտ նախապայման, դա կարող է հանրությանը նորից դուրս բերել փողոց»,- եզրափակել է Մարուքյանը։