«Առյուծները դուրս գան սթրեսից, հետո կլուսաբանեք». քաղաքապետարանը չի թողնում նկարել Ծառուկյանի կենդանիներին

Երևանի քաղաքապետարանը թույլ չի տալիս նկարահանել Գագիկ Ծառուկյանի առյուծներին։ «Իշխանություն» լրատվականի հետ զրույցում բնապահպանության վարչության պետի ժ/պ Սիրարփի Հայկազյանն ասաց, որ կենդանիները գտնվում են կարանտինում՝ կենդանաբույժների հսկողության ներքո։

«Առաջիկայում, երբ կենդանիները դուրս գան սթրեսից, և վիճակը լավանա, լրատվամիջոցներն արդեն կկարողանան լուսաբանել»,- ասաց նա։

Հարցին, թե ինչու են կենդանիներին տեղափոխել Կենդանաբանական այգի, և միջավայրի փոփոխությունն ինչ հետևանք կունենա, նա պատասխանեց.

«Քննչական կոմիտեն, որպես իրեղեն ապացույց, առգրավել է նաև կենդանիներին, և Կենդանաբանական այգին այն կառույցն է, որն ունի այն ներուժը, որ կարող է կենդանիներին իր մոտ պահել։ Մենք առաջարկել ենք մեր օգնությունը, որպեսզի կենդանիները նույնպես ապահով և անվտանգ լինեն»։

Հարցին, թե առյուծին պոչից քաշելով են տեղափոխել, և արդյոք դա վարվեցողության ճիշտ ձևն է, քաղաքապետարանի աշխատակիցն ասաց.

«Դուք մոտիկից առյուծ տեսե՞լ եք, չափերը պատկերացնո՞ւմ եք։ Վստահ եմ՝ աշխատակիցներն այնպես են աշխատել, որ ֆիզիկական ցավ չպատճառեն»։

Հ.Գ. Հարցազրույցն արվել է մինչև «Փաստինֆոյի» հրապարակումը։ Հիշեցնենք, որ լրատվականը գրել էր՝ Ծառուկյանի քնեցված առյուծներից մեկը չի արթնացել։

Արփի Ներսիսյան