«Իրենք շատ բան են ասում, գլուխները պատին են տալիս». Գալյանը՝ ընդդիմությանը

«Իրենք շատ բան են ասում, գլուխը պատին են տալիս։ Կներեք, արդեն հերիք եղավ, բոլ եղավ»․ լրագրողների հետ զրույցում, անդրադառնալով Սահմանադրության նոր տեքստին, ասել է արդարադատության նախարար Սրբուհի Գալյանը՝ նկատի ունենալով ընդդիմությանը։

«Հերիք է, բավ է։ Դա մեր ներքին գործն է։ Մենք այս աշխատանքով զբաղվում ենք արդեն տարիներ շարունակ և ուզում ենք, որ ժողովուրդն ինքը որոշի։ Թե ով ինչ է ասում, ինձ բացարձակ չի հետաքրքրում։ Ես իմ աշխատանքի տերն եմ»,- նշել է նա։

Գալյանի խոսքով՝ մշակվել է նախագիծ, որը ցանկանում են ներկայացնել ժողովրդի դատին։

«Հնարավոր է՝ կարդաք և տեսնեք, որ շատ լավ նախագիծ է, որը, օրինակ, ավելի լայն հնարավորություններ է ընձեռում ընդդիմությանը, ավելի մեծ լիազորություններ տալիս Ազգային ժողովին՝ այդպիսով հավասարակշռելով վարչապետի իշխանությունը։

Այն, օրինակ, դատական իշխանությունը դարձնում է ավելի մասնակցային և հաշվետու Ազգային ժողովի առջև, իսկ Գլխավոր դատախազությունը՝ այնպիսի մարմին, որտեղ կարգապահական խախտումների հարցերը կքննարկվեն հաշվետվողականության սկզբունքի իրացմամբ, և այսպես շարունակ»,- հավելել է արդարադատության նախարարը։