2064 դիտում, 1 ամիս առաջ - 2026-10-06 13:17
Ի՞նչ է ուզում ժողովուրդը

Բոլորը այրվեցին մեքենայի մեջ, ես էլ գետնին ընկած վառվում էի. ողջ մնացած զինվորի բացառիկ հարցազրույցը

«Իշխանություն» լրատվականի հետ զրույցում 44-օրյա պատերազմի ընթացքում Իշխանաձորի խաչմերուկում տեղի ունեցած դեպքի մասին մանրամասներ են ներկայացրել զոհված զինծառայող Արթուր Խաչատրյանի մայրը՝ Աննա Իվանյանը, և դեպքից ողջ մնացած զինծառայող Արմենը։

Աննա Իվանյանի խոսքով՝ դեպքի պահին զինվորները օդում հստակ լսել են ԱԹՍ-ների ձայները և ցանկացել են չշարժվել, սակայն, նրա պնդմամբ, մարտական գծով տեղակալ Անդրանիկ Վերանյանը հրահանգել է նստել մեքենան և շարժվել։

«Բոլորը լսել են օդում կրակոցների ձայները։ Զինվորներն ասել են՝ օդում ԱԹՍ-ներ կան, բայց Վերանյանը պնդել է՝ շարժվեք»,– նշել է նա։

Զոհված զինծառայողի մայրը նշել է, որ Վերանյանը չի ընդունում իրեն առաջադրված մեղադրանքը, մինչդեռ դեպքից ողջ մնացած զինծառայողներից մեկը պնդում է, որ նա տեղյակ է եղել իրավիճակից և հրահանգել է զինվորներին շարժվել։

«Այսօր իմ տղան 25 տարեկան կլիներ։ Ես մի տղա ունեի, և իմ տան դուռը փակ մնաց։ Չգիտեմ՝ ինչ ասեմ, արդեն ամեն ինչ ասված է»,– ասել է Իվանյանը։

Նա նշել է, որ ակնկալում է՝ Վերանյանը կընդունի իր մեղքը և կկրի համապատասխան պատիժը։

«Թող մեղքն իր վրա վերցնի ու գնա նստի»,– ասել է զոհված զինծառայողի մայրը։

Դեպքից ողջ մնացած զինծառայող Արմենը պատմել է, որ պատերազմի ընթացքում իրենք գտնվում էին Հորադիսում, երբ հրաման են ստացել շարժվել Ջաբրայիլի ուղղությամբ։ Հասնելով Իշխանաձորի խաչմերուկ՝ իրենց հրամանատարները երկնքում նկատել են ԱԹՍ։

Նրա խոսքով՝ իրենց նախապես հրահանգված էր ԱԹՍ նկատելու դեպքում իջնել մեքենայից, բացազատվել և անհրաժեշտության դեպքում կրակ բացել դրա ուղղությամբ։

«Մենք կանգնեցինք, անձնակազմը իջեցրեցինք, իրարից հեռավորություն պահեցինք, որպեսզի ԱԹՍ-ն չկարողանա բոլորին խոցել»,– պատմել է Արմենը։

Նրա խոսքով՝ այդ պահին իրենց է մոտեցել Անդրանիկ Վերանյանը և հարցրել, թե ինչու են կանգնել։

«Ասացինք, որ ԱԹՍ ենք նկատել, անձնակազմը բացազատել ենք։ Վերանյանն ասաց՝ «ոչ մի ԱԹՍ էլ չկա, նստեք, շարժվեք»։ Մենք սկսեցինք բանավիճել, որովհետև բոլորս տեսել էինք ԱԹՍ-ն»,– նշել է նա։

Արմենի պատմելով՝ Վերանյանը կրկին հրահանգել է նստել մեքենան և շարժվել։

«Երևի 5-10 րոպե չտևեց, ԱԹՍ-ն հարվածեց մեքենայի մոտ։ Բոլորը այրվեցին մեքենայի մեջ։ Ես գետնին ընկած՝ վառվում էի։ Մեր զինվորներից մեկի ծնողը՝ Հարութը, եկավ, քաշեց ինձ ու հանեց մեքենայի տակից։ Մինչև Իշխանաձորի գյուղապետը հասավ օգնության, ինձ մեքենան դրեցին ու տարան հոսպիտալ»,– պատմել է պատերազմի մասնակիցը։

Նրա խոսքով՝ դեպքի հետևանքով զոհվել են իր 18 զինակիցները, իսկ ինքը ծանր վիրավորվել է։ Նա նշել է, որ մինչ օրս բուժման մեջ է և առողջական խնդիրների պատճառով չի աշխատում։

«Հիմա ոտքիս հետ կապված խնդիր ունեմ՝ մկանային, ոսկրային խնդիրներ են առաջացել։ Չեմ աշխատում, ֆիզիկական աշխատանք չեմ կարող անել, դեռ բուժման մեջ եմ»,– ասել է Արմենը։

Նա չի ընդունում Վերանյանի այն դիրքորոշումը, թե դեպքի պահին ԱԹՍ չի եղել։

«Բացի մեր անձնակազմից՝ գյուղացիներն էլ էին այնտեղ, ոստիկանության անձնակազմն էլ էր այնտեղ։ Բոլորը տեսել են այդ ԱԹՍ-ն։ Երկինքը բաց էր, անհնար էր չտեսնել»,– ասել է նա։

Արմենի խոսքով՝ եթե Վերանյանը չլիներ, իրենք կամ կփորձեին վնասազերծել ԱԹՍ-ն, կամ կսպասեին, մինչև հակաօդային պաշտպանության ստորաբաժանումները այն վերացնեին։

«Եթե ինքը չլիներ, հաստատ էդքան մարդ չէր զոհվի։ Ես էլ հունվարին չէի դառնա էս վիճակում»,– ասել է նա։

Արմենը նաև նշել է, որ Անդրանիկ Վերանյանը ներկայում շարունակում է ծառայությունը զինված ուժերում։ Նրա խոսքով՝ սկզբում Վերանյանը կալանավորվել է, սակայն հետագայում խափանման միջոցը փոխվել է գրավով։